Puisi-Puisi Bahasa Minang Riri Satria
LABUAH PUISI
sapanjang labuah nan awak lalui
sajak dari Padang sampai ka Lambah Anai
alah dilewati pulo Padang Panjang
taruih ka Padang Lua masuak Bukiktinggi
banyak kato baserak dari masa lalu
dipunguik ciek-ciek disusun jadi puisi
aia tajun labah anai manyimpan carito
kisah-kisah mengalia sapanjang riak sungai
kosong menggema di rimbo nan bakabuik
labuah panuah jo kaba dari maso lalu
ndak talupokan, taruih tabayang di ruang mato
kaba abadi sarupo aia tajun Lambah Anai
nan mangalia taruih ke Pariaman
sarupo kabuik di kota Padang Panjang
tatapi tasuruak sarupo talago di Koto Baru
alun ado urang manggaleh bika wakatu itu
iyo takana, tapi indak nampak di ujuang mato
antah di mano kaba jo puisi tu taserak
tadanga suaro saluang manjalang sore
antah dari mano asal lagunyo
alah jarang urang nan mainkannyo
takana jo bait-bait puisi maso lalu
baserak sapanjang labuah nan langang
kabuik padang panjang
hujan di lambah anai
talago koto baru
jam gadang bukittinggi
banyak manyimpan kisah
abadi di labuah puisi
(Padang Panjang, 2018/2022)
MALATAK KATO DI LAMBAH ANAI (1)
langang di tangah nan rami
haniang di tangah nan ribuik
harusnyo kito bapuisi di siko
malatak kato sapanjang labuah
disimpan kabuik jo riak sungai
(2018)
MALATAK KATO DI LAMBAH ANAI (2)
kito malatak kato di labuah ko
nan dulu ambo bisiakkan raso
puisi tu alah tasimpan di riak sungai
dipaluak kabuik nan turun sajak pagi
(2022)
BINGKARUANG
manyalinok diam-diam
kulik licin jo basisiak
mancilok saketek demi saketek
tau-tau alah habih barang urang
tapi capek lari kok katahuan
mailang di samak-samak
sabana haniang, tapi galia
manusuak dari balakang
yo lah bingkaruang, waang!
(2017)